كتب – أمير شاهين ..
انتقد البلوجر المصري بالكويت علاء محمد، تراجع قيمة الجنيه المصري مقارنة بباقي العملات العربية والعالمية، موضحًا فى أحد فيديوهاته على”تيك توك “، أن الجنيه المصري أصبح بلا قيمة أمام بقية العملات الأخرى، وتابع قائلا “زمان كنت بغير ألف جنيه مصري بـ20 دينار كويتي دلوقتي ألف جنيه بـ5 دينار بس للأسف”.
وتابع محمد قائلا: “دلوقتي البلاد اللي بنشتغل فيها قللوا الفلوس، اللي كان بياخذ 300 فى الكويت دلوقتي بياخذ 200، واللي كان بياخذ 3 ألاف فى السعودية دلوقتي بياخذ ألفين، ولو حد اعترض يقولك روحوا شوفوا دول يعملوا كام بالمصري”.
وأبدى محمد قلقه من المستقبل وما تنتظره الأوضاع المصرية بعد استمرار قيمة الجنيه المصري فى الانهيار قائلا:”أنا قلقان من بكرة ومن اللي بيحصل في البلد، حتى الشباب اللي مسافر لو فكر يتجوز لو هيجب شبكة بـ 100 ألف جنيه، دلوقتي لو أجلها شوية الشهر الجاي هتبقى بـ200 ألف بسبب ارتفاع الأسعار المستمر، وده حال اللي مسافرين، الله يكون فى عون اللي جوة البلد”.
وانتقد محمد الحكومة الحالية التي وصفها بأنها حكومة فاشلة ومنتهية الصلاحية، وأنها السبب وراء تراجع الأوضاع في مصر.
وأوضح البلوجر المصري أن انتقاده للأوضاع الحالية والحكومة تتسبب في توجيه اتهامات له من بعض الناس بأنه مدعوم من الخارج وخائن.
وتابع محمد قائلا: “لو أنا خائن وقابض فلوس مكنتش هطلع لا بالتليفون ده ولا بالسماعة الفقيرة دي.. احنا مش هنفضل طول عمرنا متغربين، احنا بنحب بلدنا وعايزين نرجع ونستقر”.
وطالب البلوجر الحكومة المصرية بتقديم استقالتها وترك البلد لحكومة أخرى تنهض بها.
وواصل قائلا: في رسالة وجهها إلى الحكومة الحالية: “لو بتحبوا البلد دي سيبوها لحكومة تانية تقوم بمصر من تاني.. انتوا وديتونا فى حتة عمرنا ما كنا نتخيل إن مصر ممكن توصلها”.