كتبت – أميرة سلطان..
دومًا ما يشغل بال المصريين المقيمين في الخارج، البحث عن إجراءات لم الشمل لأسرهم لاسيما في دول أوروبا ومن بينهم ألمانيا علي وجه التحديد، والتي يخضع لم الشمل فيها إلي ضوابط وشروط صارمة، كشفت عنها البلوجر نور نجيب، حيث استعرضت تفاصيل مهمة تتعلق بإجراءات لم الشمل في ألمانيا للمصريين المقيمين بالخارج، مشيرة إلى خطوات أساسية يجب اتباعها وتجارب واقعية مرّت بها بنفسها خلال رحلتها في إنهاء أوراق السفر والفيزا.
لم الشمل في ألمانيا
وفي مقطع فيديو نشرته البلوجر المصرية، قالت نور: “أول حاجة، بتدخل على موقع السفارة الألمانية الاتحادية، هتلاقي فيه قسم خاص بلم الشمل، سواء من خلال جوجل أو حتى صفحة السفارة على فيسبوك”، وأكدت أن الموقع بيوضح الإجراءات المطلوبة، لكنه أحيانًا لا يذكر كل التفاصيل المهمة، “فلازم الواحد يبقى محضر نفسه كويس”.
شروط لم الشمل
وشددت نور على أهمية ترجمة كل الأوراق المطلوبة من مترجم معتمد من السفارة، مش أي حد، لأن ده من الشروط الأساسية لقبول الملف، وتابعت:”الموقع نفسه بيوجهك لأسماء المترجمين المعتمدين بالأرقام والمكاتب، فاعمل كل أوراقك صح من الأول عشان ما تترفضش”.
إجراءات لم الشمل
في سياق متصل، يعد من أهم شروط لم الشمل هو الحصول على شهادة في اللغة الألمانية، وقالت البلوجر: “لازم تكون معاك شهادة “أينس أينس واتس باي”، وده الكورس اللي لازم تمتحن فيه وتنجح، سواء حضرت الكورس أو ذاكرت أونلاين”، المهم تكون الأماكن معتمدة زي معهد جوته والأو دي كا جميعها مراكز معتمدة تقدر أي حد يقدم فيها الامتحان.
دور السفارة الألمانية
وأوضحت نور أن التقديم في السفارة بيكون على مرحلتين: الأول لختم بعض الأوراق مثل شهادة الميلاد وشهادة الزواج والقيد العائلي، وكل ختم بيكلف فلوس، والمرحلة الثانية لتقديم ملف لم الشمل كامل، وده لازم تكون كل الأوراق مترجمة ومعتمدة وجاهزة.
وأضافت: “لو متجوزين بتوكيل، هتحتاجي نسخة من التوكيل مترجمة كمان، وأنا شخصيًا دوخت فيه”، مضيفه أن من أهم الأوراق اللي السفارة بتطلبها، هي بيانات الزوج أو الزوجة المقيم/ة في ألمانيا، وده بيشمل الوظيفة، الدخل الشهري، وإثبات السكن، وغيرها.
وأكدت أن عند التقديم يتم إبلاغ السفارة الألمانية برقم هاتفي للتواصل من قبل السفارة في حالة نقص أي أوراق، لأنهم بيتصلوا لتحديد موعد استكمال، وبعد قبول الورق، بتطلب السفارة جواز السفر، ويتم بعدها تحديد ميعاد للحصول على الفيزا.
اختتمت نور كلامها بنصيحة: “كل ورقة بتتختم ليها فلوس، والترجمة كمان بمقابل، ولو الشريك معاه الجنسية الألمانية المصاريف بتكون أقل، لكن لو معاه إقامة بس، هتدفع أكتر، فاعمل حسابك”، ولفتت إلى نقطة مهمة: “في أوراق لازم تتختم من وزارة الخارجية، بس مش أي فرع، أنا ختمت ورق من الشرقية ورفضوه، وطلبوا الختم من جاردن سيتي في القاهرة.. خدوا بالكم جدًا من النقطة دي”.