كتبت – أميرة سلطان..
وثق شاب مصري مقيم في تركيا تجربته في العمل والإقامة في إحدى المدن التركية منذ عام 2018 وحتى الآن، والتي مرّ خلالها بالعديد من محطات النجاح والإخفاق، وصعوبات لم ولن تنتهي بعد رغم استقراره في وظيفته الحالية وإقامته رفقة زوجته وأولاده.
تجربة مصري في تركيا
قدّم الشاب “محمود.ع”، صاحبة التجربة، معلومات مهمة لمن يرغب في السفر إلى تركيا بحثًا عن فرصة عمل، في ضوء خلاصة رحلة 6 سنوات قضاها هناك، وقال في تدوينة نشرها عبر مواقع التواصل الاجتماعي: “هقدملكم شوية معلومات مهمة جدًا عن الشغل في تركيا للأجانب”.
وقال الشاب المصري: “عدد ساعات العمل طويلة جدًا 11 ساعة يوميًا وأغلب المصانع والمعامل تعطي إجازة يوم فقط وهو الأحد وساعة واحدة استراحة غير الوقت الضائع في المواصلات ذهابًا وإيابًا”.
وأضاف: “هنا الشغل شغل والشغل مرهق جدًا مفيش دقيقة بتعدي من غير شغل، فلما يجي واحد عمرة 45 سنة أو أكبر ويقول شغلوني في أي مصنع أو ورشة فكده أنت بتحكم عليه بهلاكه الشباب نفسهم مش بيقدروا على الشغل هنا”.
وتابع: “الأجنبي هنا بيشغلوه في المصانع والمعامل بدون تأمين أو عقود قانونية يعني لو قدر الله حصلك إصابة عمل هيقولوك مع السلامة ومش هتقدر تشتكي لأنك بتشتغل غير قانوني ويمكن بدون إقامة”.
واستكمل: “الأجنبي هنا بيشغلوه بالحد الأدنى للأجور وأحيان كثيرة أقل ولو سبت الشغل قبل ما يكمل الشهر فهيقولوك تعالى بعد ١٥ يوم ولا شهر خد الأيام اللي اشتغتلها ويا يدولك يا ميدولكش حاجة”.
وأردف: “الأجانب في تركيا بيشغلوهم في الشغلانات اللي الأتراك بيعزفوا عنها لصعوبتها وقرفها وقلة فلوسها، متحسبهاش بدماغك أنا هاخد 17 ألف ليرة في الشهر يعني 24 ألف جنيه واصرف 4 وأبعت لأهلي 20”.
وتابع: “هنا أقل سكن في أوضة هياخد منك 5 آلاف ليرة، علبة السجاير في حدود 60 ليرة، والمواصلات في اسطنبول ميزانية لوحدها، الأكل والشرب غالي هنا وهتتعب ومش هتاكل لو فضلت تحسبها بالمصري بالإضافة إنك معرض يقولك مع السلامة في الشغل غير إنك شغال غير رسمي واحتمال الشرطة تمسكك كبير جدًا للأسف”.
وأضاف: “لو جاي تركيا طالب وفاكر إنك هشتغل وهتدرس مع بعض أنسى ثم أنسى مفيش الكلام ده هي حاجة من الاتنين”.
فرص العمل في تركيا
واختتم الشاب حديثه قائلًا: “نصيحتي ليك لو هتتبهدل اتبهدل على حاجة تستحق مش تتبهدل وتتمرمط وبالذات للناس الكبيرة في السن اللي بيتنصب عليهم بعقد عمل بـ70 ألف وفيزا إليكترونية بـ30 دولار ويجيله الضغط والسكر ويتعب لما يعرف أنه اتنصب عليه ويعرف الواقع الأليم”.
وتابع: “والله ما في إقامات ولا في شغل بالدولار مستنيك ولا في أي حاجة غير اللي مكتوبة، سافر بلد تانية غير البلد دي عشان هتكره نفسك وهتكره اليوم اللي جيت فيه والشخص اللي اقترح عليك أو نصب عليك بخصوص الشغل في تركيا”.
قد يهمك الخروج من البلاد بـ500 ليرة.. رفع رسوم مغادرة تركيا يثير الجدل وتوقعات باحتجاجات شعبية